وہی چراغ بجھے جو ہوا کے ہاتھ لگے

وہی چراغ بجھے جو ہوا کے ہاتھ لگے وہ بچ گئے، تھے جو حَرفِ دُعا کے ہاتھ لگے

چمن کے سارے گُلوں کو تری مہک مل جائے بس ایک لمس جو تیرا صبا کے ہاتھ لگے

بتا تو دیتا وہ کیسے ہیں اور کہاں ہیں مگر سفینہِ والے کہاں ناخدا کے ہاتھ لگے

سگِ دوانہ جو دُنیا پہ ڈھا رہا ہے ستم خدا کرے کہ وہ ظالم سزا کے ہاتھ لگے

دُعائیں دے کے وہ قرضہ اُتار دیتا ہے کسی کی جب بھی سخاوت گدا کے ہاتھ لگے

اب اتنا ہوش کہاں ہے کہ ہم کَہَیں دیکھو کوئی نہ عشوہ و ناز و ادا کے ہاتھ لگے

زر و جواہر و لعل و گہر کو جب ہم نے نہ منہ لگایا تو اک بے وفا کے ہاتھ لگے

چڑھے ہیں سولی پہ آتے ہی زیرِ لب اکثر سوال جتنے بھی میری انا کے ہاتھ لگے

ہوس کی آنکھ سے محفوظ ہوگئے ہیں تمام وہ چاند چہرے جو اشعؔر حیا کے ہاتھ لگے