کس دورِ پُر آشوب میں ہاتھوں میں قلم ہے

کس دورِ پُر آشوب میں ہاتھوں میں قلم ہے لگتا ہے سوئے دار و رسن اگلا قدم ہے

پھر ہاتھ کہاں پھیلیں گے عقدہ جو یہ کھل جائے جو فقر سے بھرتا ہے وہ غیرت کا شکم ہے

اطوارِ جبیں سائی سے یکسر نہ مٹا دو اغیار کے ایوانوں میں تھوڑا جو بھرم ہے

وہ ہم سے خفا ہونے کو ہے، جی نہیں صاحب ہم پر تو ابھی اس کی بڑی چشمِ کرم ہے

انصاف تو بکنے ہی نہیں آیا سو اب کے بازاروں میں اندھیر کا انبار بھی کم ہے

یہ اس کی وفاداری کی پہچان ہےشاید بس ایک مری ذات پہ ہر مشقِ ستم ہے

کیوں کر نہ شجر کاری کیے جائیے اشعؔر گلشن ابھی زرخیز ہے، مٹّی ابھی نم ہے