نعتِ رسول مقبول - رہگزار غزل

نعتِ رسول مقبولﷺ

قسم ہے تجھ کو مرے شوقِ آرزوئے نبی لگا دے مجھ کو سرِ راہ جستجوئے نبی

میں لے کے اُن سے شفاعت کی بھیک لوٹوں گا رہوں گا میں نہ تہی دست روبہ روئے نبی

فرشتے آتے ہیں لاکھوں بشارتیں لے کر نویدِ خُلد ہے دنیا میں گفتگوئے نبی

میں دے کے دھرنا وہیں بیٹھ جاؤں گا اب کے خدا سے مانگوں گا دیدارِ حسنِ روئے نبی

تمام شہرِ مدینہ ہے خوشبوؤں میں بسا گلی گلی میں ہے تازہ ہوائے بوئے نبی

رہِ خدا بھی مدینہِ سے ہوکے جاتی ہے کہ جستجوئے خدا بھی ہے جستجوئے نبی

غلامِ آقا کا منصب اُسی کو ملتا ہے کہ جس میں ہوتی ہے کوئی نہ کوئی خوئے نبی

برائے مِدحتِ آقا چلا ہے جب بھی قلم مجھے لگا ہے کہ میرا سفر ہے سوئے نبی

خوشا کہ پھر ہے مجھے اک یقین سا اشعؔر بُلاوا آئے گا میرا برائے کوئے نبی