سلام

سلام

تجھے ہی کرتے ہیں صبح و مساء سلام حسین جو دست بستہ کھڑے ہیں ترے غلام حسین

جو پی گیا شہادت کا جام دیں کے لیے وہی ہے محسنِ اسلام، اُسی کا نام حسین

جو تُو نے ہم کو بہتّر طرح سے بھیجا تھا پہنچ گیا وہ ہمیں ہر طرح پیام حسین

سوائے وارثِ خیبر شکن تھا کون بھلا خدا سے ملتا جسے کربلا کا کام حسین

یزید قعرِ مُذلّت میں دفن ہے گمنام فلک پہ مہرِ درخشاں ہے تیرا نام حسین

یہ کیسی شامِ غریباں تھی جس کے زخم تمام دکھائی دیتے ہیں تازہ ہر ایک شام حسین

حدِ تَصوُّرِ انساں کو توُ نصیب کہاں بیان کیا کرے کوئی ترا مقام حسین

وہ جس کے بارے میں سن کر کلیجہ پھٹتا ہے گزاری کس طرح ہوگی وہ تُونے شام حسین

تری غلامی کا رخشندہ تاج پہنے ہوئے ملے گا حشر میں اشعؔر بھی شاد کام حسین