میں تو خود ہی دے رہا ہوں یہ بہانہ دیکھ لے

میں تو خود ہی دے رہا ہوں یہ بہانہ دیکھ لے مجھ سے بہتر کے لیے کچھ دن زمانہ دیکھ لے

بعد اک عمرِ ریاضت گر تری دانست میں تلخ ہے سچّائی تو قندِ فسانہ دیکھ لے

روپ ہیں جتنے فریبِ حُسن کے سب ہیں یہاں میرے دل میں جھانک کے آئینہ خانہ دیکھ لے

دوست سے ہےکس طرح کا ملنا جلنا کیا کہوں موج کا ساحل سے بس کنّی کٹانا دیکھ لے

تو نے پیمانِ وفا پر خود لکھا تھا ایک دن دسترس رکھتا ہوں تجھ پر مالکانہ دیکھ لے

چاہتا ہوں میں تجھے کتنا زمانہِ سے نہ پوچھ لمحہ بھر اپنا تجاہلِ عارفانہ دیکھ لے

شاعروں کی کیا کمی ہے شہر میں اشعؔر مگر کتنے لوگوں کا سخن ہے شاعرانہ دیکھ لے