غضب کی آگہی پائی دیے کی زندگی سے

غضب کی آگہی پائی دیے کی زندگی سے اندھیرا بھاگ جاتا ہے ذرا سی روشنی سے

گلے لگتے ہیں کتنے لوگ ہر محفل میں لیکن کوئی اس شہر میں ملتا کہاں ہے خوش دلی سے

بھرم کھل جائے گا بالا قدی کا ایک پل میں تم اپنا رابطہ ہونے تو دو خود آگہی سے

اُسےاب اجنبی کہنا فریبِ ذات ہوگا کہ اب تو دل ہمارا لگ گیا ہے اجنبی سے

ملا ہے اے مرے لختِ جگر دل کو اچانک یہ زخمِ دائمی تیری حیاتِ عارضی سے

حدِ فاصل کی خاطر سازشیں کتنی ہوئیں یہ دل لیکن چھُٹے کیسے تمہاری دل کشی سے

ہمیں ہر بار اُلفت کا گُماں ہوتا ہے لیکن کہاں جاتا ہے اشعؔر کوئی آگے دل لگی سے