غم فرقت سے پیہم دل تو گھبرائے بہت ہے

غمِ فُرقَت سے پیہم دل تو گھبرائے بہت ہے مگر گریہ کی حسرت بھی نکل جائے بہت ہے

ہمِیں پاگل ہیں جو الجھے ہیں تیرے گیسوؤں میں اگرچہ ناصحا ہر روز سمجھائے بہت ہے

ہزاروں بار دیکھا ہے شبِ تنہائی ہم نے کہ تیرے ساتھ اس کی بھی یاد آئے بہت ہے

مجھے کیا دوش دیتے ہو مرے دل کو سنبھالو تمہیں اپنے قرین پاکر مچل جائے بہت ہے

نشاطِ وصل کے لمحوں میں جانے کیوں ہمیشہ بچھڑ جانے کا پھر سے خوف در آئے بہت ہے

سراب اپنی حقیقت میں نظر آیا تو دیکھو تماشہ آنکھ کا دریا بھی دکھلائے بہت ہے

کوئی جب شیشۂ دل توڑ دے اشعؔر اچانک تو پھر صورت گری آئینہ دکھلائے بہت ہے