وہ ہر شے میں منوّر سادکھائی دے رہا ہے

وہ ہر شے میں منوّر سادکھائی دے رہا ہے جو رہتا ہے پسِ پردہ دکھائی دے رہا ہے

یہ اہلِ شہر کا روتے ہوئے تالی بجانا سرِ مقتل تماشا سا دکھائی دے رہا ہے

غبارِ دل مرے اشکوں نے کیا دھویا کہ اب تو جو اچھا ہے مجھے اچھا دکھائی دے رہا ہے

گُداز اتنا مرے دل کو دیا ہے عاشقی نے کہ ہر کانٹا گلِ لالہ دکھائی دے رہا ہے

سرابِ عشق کے پیچھے بھلا کیسے نہ بھاگوں میں پیاسا ہوں مجھے دریا دکھائی دے رہا ہے

یہ تیرا شہر ہے جب سے بتایا ہے کسی نے ہر اک چہرہ ترا چہرہ دکھائی دےرہا ہے

ملا تھا جو کسی کمزور پل میں اتّفاقاً مرے ہر خواب میں آتا دکھائی دے رہا ہے

ذرا سا وقت مشکل جو رواں ہے آج مجھ پر پہاڑوں کی طرح ٹھہرا دکھائی دے رہا ہے

مری حدِّ بصارت پر یقیں آئے گا کس کو سو کیا بتلاؤں میں کیا کیا دکھائی دے رہا ہے

ہر اک دُکھ درد کو اس شہر میں بس ایک شاید میری دہلیز کا رستہ دکھائی دے رہا ہے

منانے آئے گا تجھ کو جو کل روٹھا تھا اشعؔر مجھے تو یہ عجوبہ سا دکھائی دے رہا ہے