دلوں میں رہتا ہے برسوں وہ خوش نگارِغزل

دلوں میں رہتا ہے برسوں وہ خوش نگارِغزل لہو جو کرتا ہے دل کوپئے بہارِغزل

یہ فخر تجھ کو بھی ہوگا کہ اپنی جاں کی طرح عزیز رکھتا ہوں میں بھی تجھے وقارِ غزل

عطا ہوا ہے کچھ ایسا مجھے شعورِ سُخن کہ مجھ سے ہوگئی منسوب رہگزار ِغزل

اگر یہ خود پہ ہےنازاں تو ہم بھی دیکھیں ذرا سخن وروں سے جدا ہوکے دن گزارے غزل

الم سے ہوتی ہے منظوم جو فراق کی رُت اُسی کو کہتا ہے مُورکھ جہاں بہارِ غزل

رہے گا یونہی مُنوّرسدا،یقیں ہے مجھے سُخن شناس نگاہوں میں اعتبار غزل

مرے سُخن سے جو ہوتی ہے درد کی بارش اُسی کو دہر نے سمجھا ہے آبشارِ غزل

بہ شکلِ آہ و فغاں دردِ دل فریب وفا اُٹھائے پھرتا ہوں میں دل پہ تجھ کو بارِ غزل

نہ تاکہ جھوٹی تسلّی کے اور زخم لگیں چھپائے رکھتا ہوں آنسو پسِ غُبارِ غزل

لگا کے میرے قلم پر روایتوں کی حدود رکھے ہے پا بہ سلاسل مجھے حصارِ غزل

فلک نے جب ہمیں دیکھا ہے مضطرب یارو اُتر ہی آئی ہے دل پر کوئی ہمارے غزل

نزولِ حرف و معانی پہ کون قادر ہے سو کرتا رہتا ہے اشعؔر بھی انتظارِغزل